UK-a mpox variant thar kai mi 4 hmu

Britain-a health official-te chuan mpox variant thar kai mi pali an hmuchhuak tih an sawi. He variant hi Africa pawn lama an hmuh hmasak ber a ni bawk.

UK-ah mpox variant thar kai an hmuh hmasak ber chu kar liam ta khan niin, thuneitute chuan tun hnaia Africa ram hrang hranga zin a nih thu an sawi. London hospital-ah enkawl nghal a ni. He hri hi mipuia a darh a hlauhthawnawm loh niin an sawi.

Tun karah mpox vei mi pathum hmuh belh leh an ni a, anni pathum pawh hi a vei an hmuh hmasak berte nena in khata cheng ho anni. London hospital-ah dah luh an ni ve nghal bawk. UK Health Security Agency-a chief medical advisor, Susan Hopkins chuan,, "In khata cheng hoah chuan, inhnaihvai tak taka awmah chuan mpox hi inkaichhawn a awl a, hei vang hian he chhungkuaa midangah pawh hri kai hi an awm leh lo ang tih a sawi theih loh," a ti.

He variant thar hi kumin kumtir lam khan Congo khawchhak lamah hmuh hmasak ber a ni. Scientist-te chuan a kaite hian variant dang aiin an la na lutuk lo a, kai tih pawh inhre mang lote an awm avangin a darh awlsam phah niin a sawi. Congo bakah Africa ram dangah pawh a darh tawh a, August thla khan World Health Organisation (WHO) chuan global emergency a lo puan phah tawh a ni.

Britain-ah hian kum 2022-a mpox hri chi dang a len ṭum khan mi 3,000 chuangin an vei a ni. Hemi kum hian ram 100 chuangah hri hi a darh.

Tun thlengin Africa ram hran hrangah mpox hri kai hi mi 43,000 vel an awm mek nia sawi niin, mi 1,000 chuangin an thihpui tawh bawk. Thi zinga a tam ber hi Congo ram mi anni.

Nilaini kha WHO chuan mpox hri len nasatna, Africa ram pakuaah vaccine dose 899,9000 pek a nih thu a sawi.