Mutthluk vangin NKorea minister kahhlum a ni

North Korea Defence Minister Hyong Yong-Chol chu meeting neih laia a mutthluk vang leh, NKorea ram hotu lu ber Kim Jong-un a chhanlet avangin kahhlum a ni tih South Korea intelligence agency chuan a sawi.

National Intelligence Agency (NIS) deputy director, Han Ki-Beom chuan minister Hyon hi April 30 khan anti-aircraft gun hmanga kahhlum a ni a, tihhlum a nih lai hi official za telin an thlir a ni tiin parliamentary committee a hrilh.

Hyon hi kum khat dawn liam taah khan Minister of the People's Armed Forces atan ruat a ni. Military event pawimawhah a mutthlu fo a, hei bakah hian an ram hruaitu King Jong-un chu thutlukna a siam danah a chhang let fo nia sawi a ni bawk. Hemi hnu hian NKorea rama military official senior ber zinga mi, Hyon hi April thla tawp lam aṭang khan a chin hriat a ni ta lo.

Kum 2011 kum tawp lama NKorea dicator, Kim Jong-il a thih khan a fapa, King Jong-un hian a ai a awh a, thuneihna a chan hnu hian Kim hian an rama official leh thiltithei zawk nia ngaihte pawh a hrek nasa a, tihhlum tir pawh a nei nual tawh nia sawi a ni. Kum 2012-2014 chhung khan Kim hian machine gun hmangin senior official 68-te a kahhlum tir niin SKorea lam chuan a sawi. Kum 2013 khan NKorea rama thiltithei ber dawttua ngaih, a pu Jang Song Thaek pawh amah paihthlak tum leh state fund ru-a puhin a lo tihhlumtir tawh bawk.

South Korea spy agency hian Hyon tihhlum a nih chungchang hi engtinge a hriat chiah sawichian a ni lo. Mahse thla hmasa khan agency hian parliamentary intelligence committee hnenah kumin chhungin NKorea sorkarin high-ranking official 15 a tihhlum tawh thu leh, an zingah hian vice minister pahnih pawh an tel tih thute a lo hrilh tawh a ni.