US Election 2020 : Presidential Debate nei zo ta

US President thlanna neih tur atana Presidential Debate vawi hnihna leh a tawpna tur chu nimin zing, an ram huna Ningani zan khan Republican Donald Trump leh Democrats Joe Biden-ten an  nei leh. 

Presidential debate hi a tirah ṭum thum neih tura ruahman a ni a, September 29-a a ṭum khatna an neih zawh hnuah President Donald Trump chuan Covid-19 a kai tih hriat a nih tak avang leh, in enkawla in lama inkhunghran a ngaih avangin a ṭum hnihna neih tur chu ṭhulh a ni. Ningani zan khan a hnuhnung ber tura ruahman chu Nashville, Tennessee-ah neih a ni ta a ni. 

Debate neih hmasakah can­didate pahnihte hi thu sawi ṭha thei loa an inauhbuai fo avang te, mimal inbeihna ṭawngkam mawi lo tak takte an hman avangin sawisel an hlawh hle a, US Presidential debate neih tawha mumal lo ber leh hlawk thlak loh ber nia sawi a ni hial. Hei vang hian debate buaipuitute pawhin dan thar an siam  phah hial a, mi dang thusawina hun pek laiin minute hnih chhung chu lo tihbuai a nih lohna atan candidate dang microphone off sak turin an ti a ni. 

Ningani zana debate hi NBC journalist Kristen Welker-in a kaihruai a, mute button a awm tak avangin debate hmasa angin candidate-te thusawi mumal thei lo khawpa in aubuai a awm tawh lo a, an aw ki hmante pawh a ziaawm ta deuh. An inbeihna ṭawngkam an hman danah pawh candidate pahnihte pawh hi an insum tawh hle. 

Debate hnuhnung ber-ah hian candidate pahnihte chuan novel coronavirus, national security, elec­tion and China, American fami­lies, poverty and federal relief, immi­gration, race in America leh climate change chungchang an sawi a ni. 

Hei bakah hian candidate-te hi thlan tlin ni ta se, kum 2021-a lakluh an nih hnuah America mi, anmahni vote lo tute tan engnge an sawi ang, tih zawh an ni bawk.