Nepal-a lirnghing vangin mi 65 an thih belh

April 25-a magnitude 7.9-a na lirnghingin a sawi hnuah, Thawhlehni khan Nepal ramah magnitude 7.3-a nain lir a nghing leh. Thawhlehnia lirnghing vanga thi hi hriat theih chinah mi 65 an tling tawh a, mi 2,000 dawnin hliam an tuar bawk.

Official-te chuan April 25 leh a hnua lirnghing vanga thite hi an vaiin 8,200 an tling tawh tih a sawi a, chin hriat lohin mi 382 an awm bawk tih a sawi.

Thawhlehni zan leh nimin zing thleng khan lirnghing hian a la sawi nawn (aftershock) a, hei vang hian mi tam tak chu inchhungah riak ngam loin khawlaiah an awm a ni. Kathmandu-ah chuan lirnghing vang hian chenna in pariat a chhia.

District 38-ah lirnghing vang hian lei min nasa tak a thleng tih report a ni a, kawngpui pawimawh tak takte chu kaltlang theih lohin leimin hian a hnawhping a, heng kawngpui thenfai hna hi thawh nghal a ni bawk. Lirnghing hi Sindhupalchok leh Dolka district-te'n an tuar nasa ber a, mahse leiminin kawngpui a hnawh avangin chhanchhuah hna thawktute'n an la thleng thei lo.

Lirnghing vang hian Nepal Parliament session neih lai pawh tihtawp lailawk a ni a, Prime Minister Sushil Koirala chuan an mite chu chak taka awm tura fuih tur leh, hun khirh tak an tawh mekah pui turin ram dangte a ngen.

Thawhlehni vek khan lirnghing tuarte chhawmdawl hna thawktu, US Marine Corps UH-1Y Huey helicopter chu chin hriat lohin a awm a, nimin khan zawn a ni. Heli­copter-ah hian US sipai paruk leh Nepal sipai pahnih an chuang a, a thawktute'n fuel lamah harsatna an neih thu an sawi hnuah biakpawh theih lohin a awm zui ta a ni.