Lebanon PM atan Saad Hariri ruat

Kum 2019-a Lebanon prime minister a nihna aṭanga bang, Saad Hariri chu October 22 khan President Michel Aoun chuan an ram PM atan a ruat leh. A ṭum lina atan sorkar a siam leh dawn a ni. 

Parliament-a PM thar tur thlannaah Hariri hi MP 65 in an thlawp a ni. Hetih lai hian MP 50 te chuan vote an thlak lo thung. 

Covid-19 hri leng vangin Lebanon hian economy lamah harsatna a tawk nasa hle a, hei bakah hian kumin August 4 khan Lebanon khawpui, Beirut-a lawng chawlhna hmun warehouse-a ammonium nitrate dahkhawm chu a puak chiam a, hetah hian mi 200 chuang an thi a, hliam tuar mi 6,500 vel an ni bawk. 

He thil thleng hian Lebanon mipui tam tak a  ti thinur a, Beirut-a mihring chenna hmun aṭanga hnai te, lawng chawlh hmunah puak thei thil hlauhawm tak ton 2,750 zet dah a nih chungchangah thuneitute lakah an lungawi lo hle. Heng puak thei thilte hi lawng chawlhna hmuna warehouse-a kum ruk chhung dah a lo nih theih dan leh, eng vanga he hmuna dah nge a ni tihte sawifiah turin sorkar an phut a, chhiat rupna thlengah sorkar chu a rinthlak loh hle tiin mipuite chuan sorkar an dem. 

He chhiatna thlen hun laia prime miniter Hassan Diab chuan August 10 khan PM a nihna aṭangin a ban phah hial a ni. 

PM thar Hariri chuan a cabinet member atan chuan politician ni kher lo, expert-te pawh a ruat dawn thu a sawi a, economic, financial leh administrative reform lama mithiamte a ruat dawn tih a sawi. An ramah harsatna an tawh mek avangin cabinet hi a rang lama ruat fel thuai a tum thu pawh Hariri chuan a sawi bawk.