Putin-a'n 'mi huaisen' Trump a lawmpui

Russia president Vladimir Putin chuan US President atana thlan tlin, Donald Trump a lawmpui thu sawiin, 'mi huaisen' tiin a sawi.

Russia-a Sochi khawpuia hun a hmanaah, Russia President hian Trump chuan US President term khatna a chelh lai khan kil tin aṭangin beih a tawk a ni, a ti. Trump-a'n Russia-Ukraine indona thleng mek ti tawp turin a pui thei ang, tia a sawi pawh chuan ngaihven sak a phu a ni, tiin a sawi . Trump nena inbiakna nei turin a inpeih em tih zawhna chu an inpeih thuin a chhang bawk.

Putin chuan kumin July thlaa campaign neih laia thah tuma Donald Trump beih a nih chungchang pawh sawi chhuakin, hemi ṭuma a chet dan hian a rilu pawh a khawih ve tih a sawi. Trump hian rally-a thu a sawi lai kah a nih hnuah, a kut humruhin chung lamah a rawn lek chhuak a, 'fight, fight, fight' tiin a sawi zui a ni. Putin chuan, "Ka ngaihdanah chuan mipa dik tak angin dik takin, huaisen takin a che a ni," a ti.

White House chief of staff atan Susie Wiles

US President thar tur, Donald Trump chuan a thawhpui turte a ruat ṭan a, a hmasa ber atan White House chief of staff atan a campaign manager, Susie Wiles a ruat a, hmeichhe zinga he dinhmun chelh thei hmasa ber tur a ni ang. Trump hian a thawhpui tur dang pawh a puan chhoh thuai rin a ni.

Donald Trump chuan, "Susie hi mi chhel tak, ngaihdan thar ṭha tak tak nei, mi dangten an zah leh ngaihsan tak a ni," tiin an auhla, "Make America Great Again" ti hlawhtling turin a thawk chhunzawm zel dawn a ni, a ti.

President thlanna atana campaign an neih chhungin Susie Wiles hi an intilangsar lo hle a, mahse Trump-a hnehna channa kawnga mi pawimawh tak niin, campaign lai pawhin Trump hian a hming hi a lam ri fo a ni. Inthlan result puan tuka Donald Trump-a'n victory speech a neihah pawh khan stage-a thu sawi tura sawmna pawh a lo hnar a ni.

Trump-a'n electoral college vote 312 hmu thei turin chhut

Donald Trump chu US President tura thlan tlin a ni ti chiang tawh mah se, vote tlate chhiar kim a la ni lo a, result kimchang tih chhuah a nih hunah electoral college vote 312 hmu thei tura chhut a ni. Kamala Harris in 226 a hmu bawk a ni.

Inthlan dawn khan US media hrang hrangte chuan Republican candidate Donald Trump leh Democrats candidate Kamala Harris te chu inbei tawk hle tur leh, a tling zawk pawh margin tlemte chauhin an tling ang tiin an sawi hlawm. Mahse inthlan result erawh an rin lawk ang a ni ta lo hle a, Donald Trump chuan electoral college leh popular vote ah nuamsa taka hnehna changin, kum 36 chhunga Republican candidate zinga popular vote hmu sang ber a ni ta zawk.

Swing state pasariha ballot te chu chhiar kim la ni lo mah se Trump hi pangaah chak zawka puan a ni tawh. State dang pahnihah pawh a chak zawk tura rin a ni. Popular vote pawh mtd 73 hmu tawhin, Harris hian mtd 68 a hmu thung. Kamala Harris chu swing state-ah a chak lo fai vek dawnin a lang ta a, hei chauh ni loin Democrats chakna state ho zinga a chakna pawh a hniam viau. Kum 2020 inthlana New Jersey-a Joe Biden-a'n Trump a hnehna kha 16% point a nih laiin, kumin inthlanah Harris hian he state-a hnehna a channa hi 5% point chauh a ni. New York state-ah pawh vote chhiar kim a ni ṭep tawh a, a chakna hi 11% point niin, 2020 khan Biden chuan he state-ah hian Trump kha 23% point in a hneh a ni.

Kum 1932-a US President atan Franklin D Roosevelt thlan tlin a nih aṭanga Democratic Party te voting bloc nghet ber ni a sawi ṭhin, mi hang, black voter-te chuan Kamala Harris lam an ṭan viau tura rin chu an beisei ang a ni ta lo bawk. Mi hang zinga Democrats ni a inchhal hi 2020-ah 77% an awm laiin kuminah chuan 66% ah an tlahniam. Donald Trump hian tun ṭum inthlanah mi hang vote 20% a hmu pha a, 2020 inthlanah khan 13% a hmu. Latino voter zingah pawh kum 2020 inthlan aiin kumin inthlanah Trump thlawptu hi 14% in an pung bawk. A bikin mi hang leh Latino mipa zingah Trump ṭantu hi an pung a ni.

Kamala Harris hian hmeichhe vote lam a hui viau tura beisei a nih laiin, hmeichhe voter 54% ten an vote a, kum 2020-a Biden-a'n hmeichhe vote 57% a hmuh kha a pha lo. Ṭhalai, young adult zingah Trump hian thlawptu a nei pung a, kum 2020-a young adult vote 35% a hmuh chu kuminah 42% a tling thung a ni.