Australia-in kum 16 hnuai lam tan social media hman khap dawn

Australia sorkarin an rama naupang, kum 16 hnuai lam tan social media hman khapna dan a pass dawn tih prime minister Anthony Albanese chuan a sawi.

PM Albanese chuan, "Hei hi nu leh pate tan a ni. Social media hian naupangte a ti chhe nasa hle," tiin, he dan thar hi kar leh hian Parliament-ah pharh a ni dawn tih a sawi. "Keimah ang bawkin, nu leh pa dangte pawhin online lamah kan fate him dan tur hian an ngaihtuah a ni. Australia-a chhungkua zawng zawngte hnenah, sorkar chuan a thlawp zel dawn che u tih an hriat ka duh a ni," ati.

He dan thar siam tur hi kimchangin la sawi lang lo mah se, sorkar chuan kum 16 hnuai lam tawh phawt, social media lo hmang mek tawh phawt chu a huam dawn tih a sawi. Nu leh paten an phalsakte pawh ngaihnathiamna a awm dawn lo tih a sawi bawk.

Prime Minister chuan khapna dan siam chunga hmang luite tan hremna siam a ni dawn hran lo a, hetih lai hian he dan kenkawh dan tur chungchang hi online regultor, eSafety Commissioner kutah dah a ni dawn tih a sawi. Dan thar hi Parliament-a pass a nih aṭanga thla 12 chhungin hman a ni ang.