US President Election : Swing state 7-ah Trump a chak vek
US President thlanna neihah president thar atan Republican party candidate, Donald Trump chu swing state zinga pakhat, Arizona-ah a chak leh ta a, swing state pasarihah a chak fai ta vek a ni. President thlanna neihah party malin an bial him nia an ngaih ni lo, Democrats leh Republican chak ve ve theihna tur swing state, battleground state an tih bawk pasarih an awm. Heng state-a chak theih hi inthlan result-a chak zawk tur hril theitu tur anga ngaih an ni ṭhin.
Swing state-te hi Georgia, Michigan, Nevada, Pennsylvania, Wisconcin, North Carolina leh Arizona state te an ni.
US chhim thlanglam state, Arizona state-ah hian ni li chhung vote tla chhiar a nih hnuah, Inrinni khan Trump hian he state-ah hian hnehna changin, electoral vote 11 a hui vek nia sawi a ni. Tun ṭum inthlanah hian swing state pasarihah Democrats candidate, Kamala Harris lakah hnehna a chang vek a ni. Arizona hi Hispanic tamna a ni. Trump hian electoral collage vote 312 a hmu thei ta a, Harris hian 226 a hmu ve bawk.
US House leh Senate-ah Republican dinhmun ṭha
US President thlan rual US Congress, Senate leh House of Representative member tur thlanna neih pawh result kimchang hriat la ni lo mah se Republican party dinhmun a ṭha zel.
Republican hian Senate-ah majority a nei pha tawh a, 100 seat chamber-ah seat 53 an nei tawh a, Arizona leh Nevada-ah an chak rin a nih bawk avangin seat 55 an neih phak rin a ni.
House of Representative-ah pawh Republican lam dinhmun a ṭha chho zel. Seat 435 awmna House-ah seat 211 la tawhin, majoirty nei turin seat pasarih chauh an mamawh tawh. Result puan loh hi seat 25 a la awm a, Democrats lam hian House-a Republican lehpel tur chuan result la puan loh aṭangin seat 19 an lak tlin a ngai ang. Seat 11 awmna, California state ballot chhiar chhung hi a rei ṭhin avangin House result kimchang hriat theih nan ni eng emaw zat a la ngaih rin a ni bawk.
Inaugural committee chair atan mi 2 ruat
US President thar tur, Donald Trump chuan nakkum January thlaa US President tana lakluh a nihna tur buaipuitu tur, Trump Vance Inaugural Committee chairman atan Florida estate investor Steven Witkoff leh Georgia senator hlui, Kelly Loeffler-te a ruat.
Inrinni khan Trump chuan inaugural committee chair turte hi puangin, a ṭhianṭha leh amah thlawptu ṭha takte an ni, tiin a sawi. January 20, 2025-ah Trump hi US President 47-na atan lakluh a ni dawn a ni. Inaugural committee hian hemi nia an hun hman tur hrang hrang, US Capitol-a swearing-in ceremony bakah, inaugural address, parade leh a hnua a lawmna neih turte pawh an buaipui dawn a, Joint Congressional Committee on Inaugural Ceremonies (JCCIC) nen an thawk ho dawn a ni.
Trump hi a term hmasa, kum 2017-a US President atana lakluh a nih ṭum khan California billionaire, Tom Barrack chu committee chair a ni a, President lakluhna leh a behbawm atan hian USD mtd 104 an seng nia sawi a ni.