Myanmar-ah mi mtd 2 te ṭam tuar mai theiin an awm : UN

United Nations Development Programme (UNDP) in report a tih chhuah thar berah, tualchhung indona thlen mekna, Myanmar-a mipuite dinhmun a ṭha lo hle. A bikin Rakhine state-ah mi mtd 2 chuangte chu ei tur mumal nei loin,ṭam tuar mai thei dinhmunah an ding mek a ni, a ti.

UNDP chuan Myanmar ramchhung dinhmun hian ziaawm lam a pan loh a, Rakhine state-in ei leh in lama harsatna an tawh hrang hrangte ngaihven sak an nih loh chuan, nakkum kum laihawlah chuan state mipuite hian ṭam an tuar thei dawn a ni, a ti.

Rakhine state-ah hian tualchhung indona thleng bakah, kumin khaw chin ṭha tawk lo avangin an buh thar pawh a tlahniam hle a, hei bakah mi tam tak chu lo nei thei loin buaina vangin an in leh lote an chhuahsan bawk a ni. Kum 2023, October aṭanga kumin August thla thleng khan Rakhine state aṭanga himna zawnga tlanchhia hi mi nuai 5 an chuang tawh a, heng mite hi midangte ṭanpuinaah an innghat tawp rih niin UNDP chuan a sawi bawk.