Israel sorkar thar lakluh a ni

Israel Prime Minister Benjamin Netanyahu-a kaihhruai right-wing ṭangrual sorkar chu Ningani zan khan lakluh a ni.

Israel sorkar 34-na hi ṭangrual sorkar siamnaa tel party-te'n minister post insem chungchangah inremna an siam mai theih loh avangin a lakluh hun pawh darkar hnih chuangin tihkhawtlai a ngaih phah a ni.

Netanyahu chuan a kaihhruai sorkar thar chu an rama remna leh muanna, hmasawnna a awm theihna tura a thawh tur thu leh, an ram sum leh pai dinhmun pawh siamṭha tura theihtawp a chhuah tur thu a sawi. Eptu lam chuan ṭangrual sorkar thar hi sawisel nghalin, hmathlir nei lo, hnathawh tur ruahmanna mumal leh beiseina pawh nei lo niin an puh thung.

Ṭangrual sorkar hian par­lia­ment, Knesset-a seat 120-ah majo­rity a nei pha chiah a, member 61 a nei. Member tam zawk hi right-wing leh Jewish ultra-Orthodox lamṭang an ni.

Sorkar tharah hian Netanyahu hian foreign ministry a chang tel dawn a, a party Likud party hruaitu Tzipi Hotovely chu deputy foreign minister atan dah a ni. Hotovely hi Palestinian ram luahsak thlawptu langsar tak a ni. Moshe Ya'alon-a'n defence minister hna a chelh chhunzawm ang.

Likud party thawhpui, Jewish Home party chairperson Naftali Bennet chu education minister atan ruat a ni a, Justice minister atan an party member vek Ayelet Shaked dah a ni bawk.

Kulanu party hruaitu Moshe Kahlon chu finance minister atan dah a ni. Shas party tan ministerial post pathum dah a ni.

March 17-a inthlanpui an neihah khan Netanyahu-a party Likud party hian hian seat la hnem ber mah se, party mala sorkarna a siam theih loh vangin ni 42 chhung ṭangrual sorkar siampui tur zawnga party dangte inbiakna a neihpui hnuah, hun tiam a tawp hma darkar hnihah party panga-te nena thawhhona tur hi a tifel thei ta a ni.