Obama-a'n Gulf ramte puih a inhuam

US President Barack Obama-a'n Gulf ram paruk te awmna, Gulf Cooperation Council nena Camp David-a ni hnih summit a neihpui chu Ningani khan a zo a, Obama chuan Gulf ramte chu a ṭul hun apiangah venghim tura puih a inhuam reng thu a sawi.

President Obama chuan Iran nena nuclear deal siam tum chu Gulf ramte tana thil hlauhawm a nih loh thu a sawi bawk.

Gulf Co-operation Council (GCC) ah hian Bahrain, Kuwait, Oman, Qatar, Saudi Arabia leh UAE ramte an tel. US-in nuclear program chungchanga Iran inbiakna a neihpui leh inremna siampui a tum chu an duh lo a, hei vang hian summit-ah pawh hian ram tam zawk hian an hotu lute tir loin, an aiawh tur an tir zawk a ni.

Obama chuan Gulf ramte nena thawhhona ṭha an neih chuan Iran nena an inkar boruak pawh a muanawm a beisei thu leh inṭhianṭhatna a thlen theih a beisei thu a sawi.

US leh world power ram panga-te chuan Iran hi a nuclear program chungchangah inremna siampui an tum mek a, June 30 hi inremna siamna tura an hun bituk a ni. Iran inremna siampui tumna hi Gulf ramte chuan an duh lo a, an ram himna a tiderthawng thei dawn niin an sawi.