Burundi President an ramah a kir

Burundi President Pierre Nkurunziza chu Tanzania-a summit hmanga a kal hlanin an ram sipai hotuin President a nihna paihthlaksak a nih thu a puang a, an rama haw a tum pawh airport an hawnsak duh loh avangin Tanzania ramah a kir leh a ni.

Mahse nimin khan President hi Burundi ramah hian a kir thei a, thuneihna pawh a lak chhunzawm leh nghal nia sawi a ni. Official chuan President a kir leh thu hi a sawi a, mahse khawi hmunah nge a awm leh, engtinge an ramah a kir leh theih dan tih erawh a puangzar duh lo.

Sipai hotuin President an paihthlak thu a puan hnu hian, sipai zinga President thlawptu lam nen an inbei zui a, an ram national television leh radio thununtu zawk nih tumin an inkap zui nghal. President thlawptu hian hian heng hmun pawimawhte hi an thununna hnuaiah an dah a ni.

Nkurunziza paihthlak tumtu sipai pawl lama an hotu, deputy leader General Cyrille Ndayirukiye chuan an thil tumah an hlawhchhama a ngaih thu a sawi a, 'Sipai tam zawkin President hi thlawpin min bei let a ni' a ti a, an ram hmun pawimawhte chu President thlawptu lamte kutah hian a la awm vek tih a sawi.

Mipui hmuhah inlan lo mah se, nimin khan President Nkurunziza hian a twitter-ah an rama a kir thu leh, amah paihthlak tuma an beihna a hlawhtlin loh thu te a tarlang. Mipuite chu chiai lo tura chahin, buaina pawh chinfel thuai a ni dawn tihte a sawi a ni. Nkurunziza chuan amah thlawptu police leh sipaite chu lawmthu hrilhin, President a la ni reng tih a sawi.