IS-in an pawl hotu thusawi an tichhuak

Islamic State (IS) firfiak pawl chuan an pawl hotu lu ber, Abu Bakr al-Baghdadi-a thusawi record chu Ningani khan an tichhuak.

Audio record-ah hian Baghdadi hian hmun hrang hranga Muslim awmte chu an awmna ram chhuahsan a, IS-in Islam ram a din, caliphate-ah pem lut turin a chah. A thusawi hian darkar chanve vel a awh a, nikum November thla laihawl vela a thusawi an lo tihchhuah tawh recording nen pawh a inmil nia sawi a ni bawk.

Hetihlai hian IS hotu hi US kaihhruai ṭangrual pawlte'n Iraq leh Syria-a beihpui an thlaknaah na takin a hliam a, a hliam tuar loin a thi tawh nia sawi a ni. Mahse hei hi finfiahna erawh a awm lo.

Ningania IS-te'n an hotupa thusawi an tihchhuah hi amah ngei a ni em tih leh, engtik huna record nge tih hriatchian a ni lo. Mahse tun hnaia Yemen tualchhung buaina thleng mek chungchang pawh a sawilang a, hei vang hian tun hnaia record a ang tia sawi a ni.