Sipai chakna hmangin Burundi President an paih thla

Burundi President Pierre Nku­run­ziza chu Tanzania-a summit hmang tura a zin hlanin sipai chakna hmangin a thuneihna paihthlak a ni a, an rama a kir tur pawh airport an hawnsak duh loh avangin Tanzania lamah a kir leh.

Intellingence chief hlui leh February thlaa ban tak President hlui ṭhianṭha tak, Maj Gen Gode­froid Niyombare chuan Nilainia Nkurunziza-a'n Tanzania a pan veleh khan President thuneihna chu chhuhsak a ni tih a puang nghal a, hei hi mipui tam takin kawtthlerahte an lawm nghal.

Hetihlai hian sipai zingah President NKurunziza thlawptu eng emaw zat an awm a, hei vang hian sipai pawl hnihte hian national television leh radio station thununtu zawk nih tumin nasa takin an inbei zui bawk.

Kum 2005 khan NKurunziza hi Burundi President atan lakluh a ni a, President term hnihna a hmang mek a ni.

Kumin June thlaa inthlan neih tura a term thumna atan NKurunziza hian chuh leh a tum a, hei hi eptute chuan an ram danpui kalh a ni tiin, duhlohna lantirin nawrh an huaihawt a, buaina pawh vawi eng emaw zat a chhuak tawh a ni. US leh UN chuan tualchhung buaina thleng reng avangin inthlan hun hi sawn turin ngen mah se an ngenna hi a lo hnawlsak tawh bawk.

President paihthlak a nih thu hi puangin, Gen Niyombare chuan president-in a term thumna atana inthlan chuh leh a tum chu ram danpui palzutna a nih avangin hruaitu atan a pawm tawh lo tih a sawi.