Iraq-a beihpui thlaknaah IS Dy. leader a thi

Islamic State (IS) firfiak pawl hotu pahnihna, second-in-command Abdul Rahman Mustafa Mohammed, Abu Alaa al-Afari tia hriat bawk chu Iraq-a beihpui thlaknaah a thi niin Iraq defence ministry chuan a sawi.

Ministry thupuangtu, Brg-Gen Tashin Ibrahim chuan IS hotu hi Tal Afar bula mosque beihnaah a thi niin a sawi a, mahse US sipaite chuan ṭangrual pawl thlawhtheihnate'n mosque hi an beih loh thu an swai thung.

Iraq hian IS hotu lu ber, Abu Bakr al-Baghdadi chu March thla khan Iraq rama ṭangrual ramte beihpui thlaknaah kahfuh a ni a, a thi tawh niin a sawi bawk. Hemi hnu hian Afari hian IS enkawl hna hi a chelh chho ta nia sawi a ni.

Gen Ibrahim chuan Afari hi al-Shuhada (Martyrs) mosque-a meeting an neih laiin kah fuh a ni a, a rual hian firfiak dang eng emaw zat pawh an thi tih a sawi. He mosque hi Tal Afar khaw bul, al-Iydihya thingtlang khuaa awm a ni. Tal Afar hi Nineveh province hmarlama awm a ni a, kum 2014 June thla khan IS firfiakte hian an la a ni.

General hian khawi ramin nge beihpui thlak tih leh a hun pawh hi a sawilang lo. Mahse official pakhat chuan Thawhlehnia thleng kha niin a sawi.

Nineveh Governor, Atheel al-Nujaifi chuan Afari hi a thi ngei tih an finfiah thu a sawi.