Trump-a thlawptute ṭanpui lo tura thupek siamtu Fema supervisor a hna aṭangin ban a ni

Thlipui, hurricane Milton-in October thlaa US-a Florida a nuai ṭuma thlipui tuartute zinga Trump thlawptute ṭanpuina pe ve lo tura thupek siamtu, Federal Emergency Management Agency (Fema) supervisor chu a hna aṭangin ban a ni. Supervisor hi a hming erawh puanzar a ni lo.

Hurricane Milton hi US President thlan hmaa tleh kha niin, thlipui tlehin thil a tih chhiatte leh, thlipui tuartute dinhmun enfiah tura Fema staff kalte hnenah, supervisor hian an chenna in kawta Republican candidate, Donald Trump an thlawpna sign tartute chu kal kan vek turin a ti a ni. Hnathawktute chuan sorkar hotu lam aṭanga hetianga inthliarna nasa a awm chu hriatthiam har an tih thu an sawi.

Fema director, Deanne Criswell chuan supervisor thil tih dan chu a dem tak zet tih sawiin, Fema chuan chhiatna thlen lai leh a hnuah pawh mi zawng zawng ṭanpui chu a tum ber a ni, a ti. Hetiang thil hi a thlen nawn tawh lohna turin a theihtawp a chhuah tur thu a sawi. Florida Governor Ron DeSantis chuan he thil thleng hi Division of Emergency Management chuan a chhui chiang dawn tih a sawi bawk.

Congressman James Comer chuan Fema supervisor thil tih dan chungchangah, director Criswelol chu November 19-ah hian House Oversight Committee hmaa inlan tura koh a ni dawn tih a sawi. Missiouri senator, Josh Hawley pawhin he thila inhnamhnawihte chu thubuai siamsak an nih tur thu a sawi bawk a ni.

October thla khan hurricane Milton hian Florida nuaiin, chhiatna nasa tak a thlen a, in tam tak a chhiat bakah tuilian an tuar bawk. Thlipuiin chhiatna a thlenah hian mi 24 in nunna an chan a ni.