Trump-a'n 'border czar' atan thawm nei lian Homan ruat

US president-elect, Donald Trump chuan a campaign lai aṭanga au hla pakhat, an rama dan loa lutte thawn haw chungchang a sawi chu a taka kalpui ngei a tum dawn a, ramri thununna kawnga hma la tu leh hotu, border czar atan U.S. Immigration and Customs Enforcement (ICE) agency hotu hlui, thawm nei lian Tom Homan a thlang.

Trump chuan 'border czar' atana Tom Homan a thlan thu a puannaah hian, ani anga ramri thununna kawnga ṭha tur an awm dawn lo tih a sawi. Homan chuan dan loa US-a awmte an rama thawn kirna tura ṭul zawng zawngte a buaipui vek dawn tih a sawi.

Homan hi Trump-a President term hmasaa immigration policy 'zero tolerance' kalpuinaah pawh hma la tu ber niin, US border kaltlanga document felfai nei loa pem lutte chu an ram himna tiderthawng an ni tiin, hei hi chinfel a ngaih thute pawh a lo sawi tawh a ni. Republican National Convention-ah khan dan loa US-a pem lutte chu lo in pack ṭan rawh u, a ti a ni.

Kum 62 mi, Homan hi a hmain New York state-ah police officer niin, a hnuah border patrol agent-ah a awm. Democrats president hlui, Barack Obama khan ICE-a deportation branch hotuah kum 2013 khan a lo ruat tawh a, dan loa an rama lut mi tam tak an thawn haw a ni. A hnathawh ṭhat avangin civil service chawimawina sang ber, Presidential Rank Award pawh hlan ni tawh bawk.