Egypt President hlui thi turin an relsak

Egypt-a Cairo Criminal Court chuan an ram president hlui, Mohammed Morsi chu kum 2011-a lung-in tangte tlanchhuahnaa inhnamhnawihna thubuaiah thiam loh a chantir a, kar kalta Inrinni khan thi turin a chungthu a relsak. A rual hian midang 100 chaung pawh thiam loh chantir an ni bawk.

Morsi hi thuneihna a chan laia amah paihthlak tuma helte man leh sawisa tura thupek chhuaha puh a nihnaah kum 20 tang tura hrem mek a ni.

President hlui party, Muslim Bortherhood chuan court thutlukna siam hi thil awm lo tak nia an ngaih thu an sawi.

Kum 2013 July thla khan hun eng emaw chen mipuite'n Morsi-a duh lohna lantira nawrh an huaihawt hnuah, President a nihna aṭang hian sipai chakna hmanga paihthlak a ni. Paihthlak a nih hnu hian Morsi-a party, Muslim Brotherhood chu dan pawnah hnawl nghal a ni a, Morsi-a thlawptu mi sang tel chu man an ni bawk.

Egypt court chuan hardcore football fan club, Ultras tia sawi chu dan pawnah a hnawl bawk. He pawl hi kum 2011-a hetihlaia president, Hosni Mubarak-a duh lohna lantira nawrh huaihawtnaa a bultumtu zinga tela puh a ni.

Judte Shaaban el-Shami-a'n Morsi hremna tur a puan lai hian Muslim Brotherhood group member-te chuan an lungawi loh thu an auchhuah pui a, an rama sipai rorelna chu tihtawp an duh thu an sawi. Court thutlukna siam hi sakhaw lama thuneitu sang, grand mufti hnenah a remtihpuina la turin thawn a ni ang. Mufti hian thi tura hremna pek hi a duh loh thu sawi mah se, court chuan a thutlukna siam hi a kaltlangpui thei dawn tho a ni.

Inrinnia Morsi hremna tur puan chhuah a nih hnu hian Egypt hmarlam, Sinai bialah judge pathum kahhlum an ni. Cairo Criminal Court-in Morsi leh Muslim Brotherhood hruaitute hremna tur a puanchhuah aṭanga darkar hnih velah, silai kengte chuan Al-Arish City-ah judge-te chuanna motor hi an bei a, judge pathum leh an driver an kaphlum a, midang pathumin hliam an tuar.

Sinai biala pawikhawihna thleng hi eng pawl mahin an tih niin an chhal lo a, mahse pawikhawihtute hi Sinai-a helpawl, Ansar Bayt al-Maqdis tih nia rin a ni. He pawl hian tun hnaiah Islamic State (IS) firfiak pawl an thurualpui thu an lo puang tawh a ni.