Lirnghing vangin mi 8,500 an thi tawh US helicopter tla hmuh chhuah a ni
April 25-a magnitude 7.9 leh May 12-a magnitude 7.3-a naa lirnghingin a sâwi avanga Nepal rama chhiatna thlenga thi chu mi 8,500 dawn an tling tawh a, kar kalta Thawhlehnia chin hriat loha awm, US military helicopter, UH-1Y Huey helicopter tla them chu darkar 60 chuang zet zawn a nih hnuah Dolakha district-a Kalinchowk tlangah hmuh a ni.
Nepal Defence Ministry Secretary Ishwori Prasad Paudyal chuan helicopter-a chuang, US sipai paruk leh Nepal sipai pahnihte zingah damchhuak an awm lo niin a sawi.
April 25-a lirnghing na takin Nepal a sâwi hnu khan a sâwi nawn (aftershock) hi ṭum 227 a thleng tawh a, Inrinni zing pawh khan magnitude 4.5-a nain a sâwi nawn leh niin National Seismological Centre chuan a tarlang.
Red Cross chuan Nepal rama lirnghing tuarte ṭanpui leh chhawmdawlna tura sum mamawh zat chu tisangin, dollar maktaduai 93 a ngai dawn niin a sawi. April 25-a lirnghing tuarte chhawmdawlna atan khan Red Cross hian dollar maktaduai 35 a ngai dawn tih a sawi a, mahse kar kalta Thawhlehnia lirnghing na takin a sâwi leh avanga chhiatna hrang hrang a thlen chhunzawm leh vangin sum mamawh zat hi a pung a ni.
Lirnghing vanga chenna mumal nei loa awm mi tam takte chu fur ruahtui a tlak hma ngeia an awmna tur pek a ngai tih sawiin, aid agency chuan fur hmaa an awmna siamsak a nih loh chuan leiminin inkalpawhna tam tak hnawhpingin, hei hian harsatna lian zawk a thlen leh dawn a ni, a ti.