IS-te'n Ramadi khawpui an la

Islamic State (IS) firfiak pawl chuan Pathianni khan Iraq-a Anbar province khawpui, Ramadi chu security force-te kut aṭangin an laksak.

Firfiak pawl leh security force-te hi hun eng emaw chen an inbeih hnuah, Ramadi hmarlama a Eight Brigade headquarters-a sipai awmte chu an insaseng a, firfiakte hian sipai headquarters hi an la nghal a, khawpui pum chu an thununna hnuaiah an dah nghal bawk.

IS-te hian Ramadi khawpui chhuahsan tum chhungkaw eng emaw zat an man bawk. Ramadi khuaa inbeihnaah hian civil mi 500 vel an thi a, mi 8,000 velin khawpui hi an chhuahsan.

Kar kalta Ningani aṭang khan IS hian Ramadi khawpui hi lak tumin an bei a, hemi ni hian khawpui chhunga Jamiyah leh Albu Alwan district te an la nghal a ni. Zirtawpni khan khawpui hi lak belhin Inrinni-ah government compound an la zui bawk.

Iraq air force-te chuan Ra­ma­di-a firfiak nena inbei, secu­rity force leh an thawhpui tualchhung helpawlte chu thlawhtheihna hmangin an pui a, anni bakah US kaihhruai ṭangrual sipaite'n Ramadi khaw­pui leh pawn lama IS hmun pawimawh eng emaw zat chu an lo bomb bawk. Mahse heti chung hian firfiakte hian hma sawn zelin, Pathianni zan khan khawpui hi an kutah a la thei ta a ni. Ramadi bakah Anbar province hmun tam tak pawh IS kutah hian a awm tawh a, Iraq ram khawpui, Baghdad lak tumin an bei mek a ni.

Hetihlai hian Iraq sorkar chuan Ramadi khawpui laklet leh nghal tumin sipaite a thawn dawn a, Prime Minister Haider al-Abad chuan sipaite chu Anbar province-a an post-te chhuahsan lo turin a ngen.