Tunisia PM-in fiahna paltlang zo lo

Tunisia Prime Minister Habib Essid chuan Parliament-ah fiahna a paltlang zo lo a, thla 18 PM din≠hmun a chelh hnuah a thuneihna aṭangin paihthlak a ni.

Kar kalta Inrinni-a Parliament-a PM rintawk lohna motion put luha vote lakah hian, member 118-ten PM hi an thlawp lo a, pathumin thlawpin, member 27 chu vote thlaknaah hian an hai thung.

Vote lak a nih hma hian Essid chuan paihthlak a ni dawn tih a rin sa thu a sawi a, "Helaiah hian office ka luah chhunzawm zel theih nan vote 109 hmuh tuma lo kal ka ni lo a, mipui leh parliament member-te hnenah thil awmdan puang chhuak tura rawn kal ka ni" a ti. PM thlaktu tur hi vawiin hian ngaihtuah a ni ang.

Essid-a kaihhruai ṭangrual sorkarah hian pawl pali an awm a, an zingah hian Nidaa Tounes leh Ennahda party pawh an tel. Ennahda hotu Rached Ghannouchi chuan ṭangrual pawlte hian hruaitu thlak tur chungchangah hian inremna pawh an lo siam tawh niin a sawi.

Tunisia ram hian sum lamah harsatna a tawk mek a, hna nei lo an pun bakah tunhnaiah security lamah pawh harsatna an tawk a ni. Hei vang hian President Beji Caid Essebsi chuan an ram dinhmun siamṭha tura sorkar thar din a ngaih thu sawiin, PM pawh hi bang turin nawr a lo ni tawh a ni.