Philippine President-in helpawl nena inkahhai titawp

Philippine President Rodrigo Duterte chuan leftist helpawl nena inkahhai thuthlung an siam chu a titawp a, security force-te chu inralring turin a hriattir nghal bawk.

Inrinni zan dar 7 khan thuchhuah siamin Duterte chuan, "July 25-a communist helho nena inkahhai kan lo puan tawh chu tihtawp a ni" tiin a puang. Duterte hian helpawlte hian inremna siam tura a rawtnate an pawm beisein July 25 khan Communist Party of the Philippines,New People's Army leh National Democratic Front-te lakah inkahhai hi alo puang tawh a ni. Mahse helpawlte hian a rawtna siamte an zawm loh avangin inkahhai puan hi tihtawp a ni leh ta a ni.

President Duterte chuan helpawl laka inkahhai an puan tihtawp a nih leh tak avangin security force-te chu inralring turin a chah nghal a, an ram himna tiderthawng thei nia hriatte nuaibo tur te, mipuite venghim tur te, dan leh thupek kengkawh tur tein a chah a ni.

Philippine military chuan NPA hian member 4,000 vel an nei niin a sawi a, hel pawl hi kum 1969 aṭang khan inlakhran duhin sorkar lakah a hel tawh a ni. Kum 1986 aṭang khan sorkar chuan inremna siampui tumin vawi tam tak a bei tawh a, mahse inremna an la siam thei lo a ni.