US President Election : Clinton-i'n hma a hruai

Kumin November thlaa US President thlanna neih turah party pahnih, Democratic Party leh Republican Party-te chuan an official candidate tur an puang ve ve tawh a, mipui ngaihdan lak hnuhnung berah Democratic nominee Hillary Clinton-i chuan Republican nominee Donald Trump-a lakah hma a hruai mek.

Kar kalta Ningani khan Democratic National Convention, Philadelphia-a neih chu zawhfel a ni a, convention zawhah mipui ngaihdan lakah Clinton-i hi a rawn invawrh sang a, Trump-a laka hma a hruaina point li ni tawh chu sang chhoin, point kua zetin an inthlau leh tawh a ni.

Public Policy Polling (PPP) chuan opinion result hi a tichhuak a, Clinton-i chuan hma hruai mah se thil lawmawm tak a la ni lo tih a sawi a, a sanna chhan hi convention nghawng a la ni thei tih a sawi.

Candidate pahnihten party official nominee an pawmna thu an sawi, TV-a tihchhuahah chuan Donald Trump thusawi hi thlirtu an tam zawk thung. Republican Convention-a Donald Trump-a thusawi hi thlirtu mipui maktaduai 32.2 an awm laiin, Democratic Convention-a Hillary Clinton-i thusawi thlirtu chu mi maktaduai 29.8 an ni.

Hetihlai hian Russia tana enthlatu nia hriatten Clinton-i campaign-na tura thil pawimawh dahkhawmte an hack sak niin Clinton-i press secretary Nick Merril chuan a sawi. Merill chuan ramchhung hmun hrang hranga an thawhpuite hnena thawn tura computer-a an dahkhawmte chu internet hmangin an lo en ru nia sawiin, eng tiang chiahin nge an khawih erawh an la hriat loh thu a sawi. He thil thleng hi FBI bakah Justice Department-in a chhui dawn a, Democratic Congressional Campaign Committee chuan security firm, Crowstrike chu chhui chiang turin a ruat bawk. Russia sorkar chuan he thilah hian inhnamhnawihna a neih loh thu a sawi ve thung.