Korean Peninsula-a THAAD dah tum dem

US leh South Korea-in July thla tir lamah Korean Peninsula-a US missile defence system, Terminal High Altitude Air Defense (THAAD) dah tura thutlukna an siam chu North Korea chuan na takin a sawisel a, South Korea khawpui Seoul-ah pawh THAAD dah tum hi duh lohna lantirin kawngzawhte huaihawt a ni bawk.

NKorea chuan missile defence system dah tura ruahman hian Korea ram pahnih inkar boruak a tichhe zawk dawn niin a sawi a, an dah lui a nih chuan a theih anga a beihlet tur thu pawh a lo sawi tawh a ni.

SKorea ram chhungah pawh THAAD system dah tumna duh lo hi mi eng emaw zat an awm a, Seoul-a defence ministry office kawhahte te he thutlukna siam hi sut tura phutin kawng an zawh a ni.

THAAD system hi nak≠kumah dah fel hman tum a ni a, hei hi NKorea aṭanga nuclear leh missile hmanga beihna thleng thei laka lo invenna tur niin SKorea leh US chuan a sawi. Mahse he system dahna tura thlan, Seongju khuaa mite chuan zan 10 zet an duh lohna an lo lantir tawh a ni. Nawrh huaihawtte chuan he system dah hian North leh South Korea inkar boruak chiah a tichhe dawn lo a, Northeast Asia pumah nghawng ṭha lo a nei dawn a, SKorea chu indona hmunah a hruai lut dawn a ni, an ti.

China leh Russia pawhin missile system dah tum hi an sawisel a, Korean Peninsula boruak a tichhe zawk dawn nia an ngaih thu an sawi.

NKorea news agency, Korean Central News Agency (KCNA) chuan THAAD dah hian Asia Pacific-ah indona a chawh chhuah mai theih thu a sawiin, he thil hi US-in Northeast Asia chunga ro a rel tumna hmanrua leh, Korean Peninsula chhehvel ramte thunun a tumna a ni, a ti.