Suu Kyi-in Campaign A Ṭan

Myanmar ram hruaitu Aung San Suu Kyi-i chuan nimin khan an ram khawpui, Nay­pyitaw-a National League for Demo­cracy (NLD) party headquarters-ah November 8-a an ram inthlanpui neih tur atana campaign bul ṭanna a nei. 

State counsellor Aung San Suu Kyi hian campaign hi Yangon khawpui aṭanga neih ṭan tum mah se, hri leng vanga health ministry lam thurawn avangin a zin tur a ṭhulh a, nimin khan Naypyitaw-ah campaign hawnna hi a nei ta zawk a ni. 

NLD party headquarters-ah party flag pawtpharin, Suu Kyi chuan hnehna chang tura an campaign chu ṭan a ni ta tih a sawi. Ram chhung hmun hrang hranga an party thlawptu leh, an inah party flag zartute lawmthu a hrilh nghal bawk. Campaign bul ṭanna inkhawm buatsaih hi Facebook page-ah live-in tihchhuah a ni bawk. 

Kum 2015 inthlanpuiah khan NLD hi hneh taka thlan tlin a ni a, kumin inthlan tura pawh a chet ṭhat leh beisei a ni. 

Hetih lai hian ram chhungah hri leng avangin an ram economy pawh a tlahniam hle a, World Bank chuan financial year kal mekah Myanmar ram economy ṭhanna chu a hmaa 6.8% aṭangin 0.5% ah a tlak thlak a ring. 

Myanmar rama Covid-19 kai hmuh chhuah tawh hi mi 1,562 an awm tawh a, mi pariatin an thihpui tawh bawk. Nimin khan hri kai hmuh thar mi 93 an awm. Yangon-ah partial lockdown kalpui leh a ni a, ram chhungah zirna inte khar vek a la ni bawk. Mi 50 aia tam punkhawm khap a nih avangin, party hrang hrangte tan pawh campaign kalpui dan tur a nghawng hle a ni.