Egypt rama China ṭawng zir turin inremna ziak
Egypt-a pre-university school-ah China ṭawng zir a nih theih nan, Egypt leh China chuan Thawhṭanni khan inremna an ziak.
Egypt Minister of Education and Technical Education, Tarek Shawki leh Chinese Ambassador to Cairo, Liao Liqiang chuan inremna protocol hi an ziak a ni. China
ṭawng hi Egypt-a pre-university school-a second optional foreign language tur atana ruahman a ni bawk.
Thawhdunna tur inremna an ziah chungchangah hian Tarek Shawki chuan China-in economy lama hmasawnna a neih chu an hlawkpui ve ngei a rin thu a sawi a, kawng tam takah an inremna ziah chuan an ramah hmasawnna a thlen ngei a beisei thu a sawi bawk. Egypt hi Arab leh Africa ram zinga China nena diplomatic relation nei hmasa ber an nih thu Shawki chuan a sawi a, kum 1956 aṭang daih tawh khan an thawhdun tawh thu a sawi.
China hian Egypt-a school-ahte solar power plant dah a nih theih nan a lo pui tawh a, technical education tan workshop a lo buatsaihsak tawh bakah, secondary school-a electronic screen-te hman a nih theih nan a lo pui tawh a ni. Heng bakah hian smart classroom pawh China hmalaknaa siam a ni tawh bawk.
Egypt khawpui Cairo-a Chinese Embassy tarlan dan chuan Egypt-ah hian Chinese philosopher Confucius-a Institute pahnih a awm a, Cairo University-ah pakhat leh Suez Canal University-ah a awm bawk a ni.
Egypt-a university-ah Chinese language department a awm bawk a, nikum khan China chuan Egyptian-te tan scholarship 300 chuang a lo buatsaihsak tawh bawk a ni.