Thailand PM hlui thubuai ngaihtuah a ni

Thailand Prime Minister hlui, Yingluck Shinwatra-i thubuai chu nimin khan Supreme Court-ah ngaihtuah ṭan a ni a, a thubuaiah hian thiam loh chantir a nih chuan kum 10 thleng jail-a tantir theih a ni ang.

Nikuma PM a nihna aṭanga ban, Yingluck Shinawatra-i hi thuneihna a chan laia amah thlawptute duhsakna lantir nana sorkarin sum tam tak a hloh phahna tur rice scheme siam chungchangah a mawhphurhna ngaihthahah puh a ni.

Hetihlai hian Yingluck-i chuan an puhnaah hian thiam lohna a neih loh thu leh, politics lama an hmelmate'n an chhungkaw hrekbeh an tumna hmanrua mai niin a sawi thung. Amah pawh a thubuai hmachhawn tura a inpeih thu leh, thu dik tak chu a la lanchhuah tur thu a sawi. Nimina court-a a thubuai ngaihtuah a nih lai hian court pawn lamah Yingluck-i thlawptu mi 200 vel an pungkhawm.

Court chuan PM hlui hi ram pawn lama zin chhuak lo turin a ti a, an ram pawisa baht maktaduai 30 ($899,280) dahkhama bail-a chhuah a phalsak bawk. Thubuai hi July 21-a ngaihtuah leh tura tih a ni.

PM hlui hi mimala eirua puh a ni lo a, mahse a kaihhruai sorkarin rice subsidy scheme a siam hmanga eirukna nasa tak veng zo loah puh a ni. Rice subsidy scheme hmang hian sorkar chuan an ram hmarchhak lama Shinawatra chhungkhaw thlawptute awmna biala loneitute buhfai thar chu market rate aia a let zeta sangin a leisak a, hei vang hian sorkar chuan sum tam tam a hloh phah a ni. Mahse Yingluck-i hian he scheme hi loneitute puihna tura siam a nih thu a sawi thung.

Nikum May thla khan Consti­tutional Court chuan Yingluck-i hi a thuneihna dik lo taka hmanga puhin Prime Minister a nihna aṭangin a ban a, hemi hnu hian sipaite chuan thuneihna hi an chelh zui a ni.

Kumin January thla khan sipai sorkar ruat, legislature chuan rice subsidy scheme-a a inhnamhnawih avangin PM hlui hi legislature member a nihna aṭangin a ban a, kum nga chhung politics khel thei lo tura hrem zui a ni.

Yingluck-i u, Thaksin Shina­watra pawh Thailand PM hlui a ni a, kum 2006 khan a thuneihna aṭanga paihthlak niin eiruk thubuai siamsak zui a ni. Thaksin hi ram pawn lamah himna zawngin a awm mek a, mahse a nauin PM dinhmun a chelh lai hian rorelna kawngah a inrawlh nasa hle nia sawi a ni.