Burundi President-in a minister-te a ban
Sipai chakna hmanga paihthlak an tumna a hlawhchham hnuah, Burundi President Pierre Nkurunziza chuan amah paihthlak tumnaa inhnamhnawiha puh, defence, external relations leh trade minister-te a ban.
President Nkurunziza hian a term thumna atan an ram president thlannaah chuh leh a tum a, hei hi ram danpui kalh a ni tiin eptute chuan nasa takin an dodal a ni. Kar hmasa khan Tanzania-a summit hmang tura a zinchhuah laiin sipai chakna hmangin a thuneihna hi paihthlak a nih thu puan a ni a, an rama a kir pawh an phalsak lo a ni. Mahse sipai zingah amah thlawptu eng emaw zat awmin, a hnuah an ramah hian a kir leh thei a, President nihna pawh hi a chelh zui leh ta a ni.
Minister a ban takte thlaktu tur pawh hi ruat fel nghal a ni. President thupuangtu, Gervais Abayeho chuan President hian ṭul a tih hun apianga a cabinet siksawi turin dikna a nei tih a sawi.
Eptute chuan Nkurunziza-a'n president chuh leh a tumna chu tihtawp tumin an la nawr chhunzawm reng a, Thawhṭanni khan nawrh huaihawta pungkhawmte lam hawiin sipaite'n silai an hmetpuak a ni.