Yemen-ah inbeih an chhunzawm leh

Yemen helpawl Houthi leh Saudi Arabia kaihhruai ṭangrual pawlte'n ni nga chhung inkahhai an puan chu Pathianni zan khan a tawp a, Thawhṭanni aṭang khan pawl hnihte hi an inbei chhunzawm leh nghal a ni.

Ṭangrual pawlte hian Aden province-a Houthi hmun pawi­mawhte chu an bomb leh nghal a, hei bakah hian Yemen-Saudi ramri bul, al-Manzala district pawh Saudi sipaite'n an kap leh nghal niin Houthi TV channel, Al-Masirah chuan a tarlang.

Yemen rama UN palai, Ismail Ould Cheikh Ahmed chuan pawl hnihte chu ni nga dang inkahhai puang leh turin a ngen. Seoul-a cham mek, US Secretary of State John Kerry pawhin US chuan inkahhai puan chu a thlawp thu a sawi bawk.

Hun rei tak tualchhung buaina thleng tawh chu chinfel dan kawng zawngin Pathianni aṭang khan Yemen political party hrang hrangte'n inbiakna an nei ṭan a, mahse he meeting-ah hian Yemen sorkar paihthlak tuma hel, Houthi aiawhte erawh an tel lo.

UN chuan Yemen tualchhung indona thlenga civil mite'n nasa taka an tuar chu pawi a tih thu a sawi a, inremna kawng zawng turin a ngen. March thla aṭanga tualchhung indona thleng vang hian mi 1,600 chuang an thi tawh niin a tarlang bawk.