Shiite sipai-te'n Ramadi lak let an tum

Islamic State (IS) firfiakte'n Iraq rama province lian ber, Anbar province khawpui Ramadi lain, he khawpuia security force awmte pawh an insaseng a, mahse Shiite sipaite chuan he khawpui hi laklet leh ngei tumin an inbuatsaih mek.

Shiite fighter 3,000 vel chu Ramadi bula sipai hmunpuiah an inkhuar mek a, Iraq khawpui Baghdad hmarthlang lama awm, Ramadi hi laklet leh an tum a ni.

Firfiakte'n Ramadi khawpui hi la mah se, Iraq security force-te chuan khawpui chhak lama awm, an headquarters chu an la venghim thei a ni. Iraq Prime Minister Haider al-Abadi hi Shiite hnam a ni a, a ni hian Sunni khawpui Ramadi lalet tur hian Shiite sipaite tirh a rel a ni.

United Nations chuan IS-te'n Ramadi khawpui an lak hnu hian khawpuia cheng, mi 25,000 vel chu an tlanchhe tawh niin a sawi. Kumin April thla khan khawpuia inbeihna thleng vangin mi 130,000 vel chu an lo tlanchhe tawh bawk.