Nepal sorkarin in thar sak a khap lailawk

Nepal sorkar chuan in thar sak a khap lailawk a, khapna dan hian an rama lirnghing rapthlak tak a thlen hmaa sorkarin sak phalna a lo pek tawh, sak laklawh lai mekte pawh a huam tel vek a ni.

Ministry of Local Development-in thuchhuah a siamah, in sak khap lailawkna dan hi July 16 thleng atana tih a nih thu a sawi a, sorkarin building code a siam zawm lo te, tun hnaia lirghing avanga dinhmun him lo te chu ṭhiah vek an ni ang, a ti.

Nepal sorkar chuan in sakna tura dan a siam, building code a hman mek chu a ennawn dawn a, a ṭul angin a siam danglam ang. Hemi hma chuan dan siamsa hi hman chhunzawm a ni ang. Dan siam thar a tum zingah hian in sakna tur leh sak lai mek pawh chhawng hnih aia sang sak khapna pawh siam tum a ni.

April 25 leh May 12-a lirnghing, magnitude 7.9 leh 7.3 in a sâwi avang khan Nepal ramah hian chhiatna rapthlak tak a thleng a, mi 8,600 chuang an thih bakah 21,000 velin hliam an tuar. Nepal sorkar leh UN in a chhut danin, lirnghing hian chenna in 530,000 a tichhia a, hei bakah hian in 300,000 chu luahzui ngam lohin an awm bawk. Heng zingah hian school building 20,000 a tel.