NKorea-in ballistic missile kapchhuak

North Korea chuan nimin zing khan ballistic missile a kapchhuak leh a, km 1,000 a thui a thlawh hnuah Japan tuipuiah a tla niin South Korea leh Japan chuan an sawi.

UN resolution chuan NKorea hi nuclear leh ballistic missile technology siam leh enchhin a khapsak a, mahse khap a ni chung hian ṭum eng emaw zat a enchhin tawh a ni.

US Strategic Command chuan NKorea hian missile pahnih a kapchhuak a, pakhat chu kahchhuah a ni hnu lawkah a puak niin a sawi. South Korea Office of the Joint Chiefs of Staff chuan nimina missile kahchhuah hi Pyuongyang chhimthlang lam, South Hwanghae province aṭangin zing dar 7.50 velah kahchhuah a ni tih a sawi. NKorea-in a kahchhuah tawh zinga thleng thui ber nia hriat a ni bawk.

Japan defence ministry chuan missile hi exclusive economic zone (EEZ) huam chhungaha tla niin a sawi a, Prime Minister Shinzo Abe chuan hei hian Japan himna a tiderthawng thei a ni tiin, NKorea chetdan chu ngaihdam theih loh thil a ni, a ti.

US pawhin NKorea thiltih chu an dem thu a sawi. State Department thupuangtu Anna Richey-Allen chuan NKorea-in US leh a thawhpui ramte a beihna tur lakah inveng turin an inbuatsaih zel thu a sawi. NKorea-in ballistic missile technology a hmang chu UN Security Council resolution palzutna a nih thu a sawi.

Nimina NKorea missile kahchhuah hi Rodong-type medium-range missile nia hriat a ni.