Obama'n Donald Trump thlawpna titawp turin ngen

US President Barack Obama chuan Republican president candidate, Donald Trump chu US President ni tlak a ni lo tiin, ramchhung leh international affairs chungchang hriat a nei lo nia sawiin Republican party, GOP (Grand Old Party) hruaitute hnenah an party nominee an thlawpna chu titawp turin a ngen.

Obama chuan President ni tura Trump-a inbuatsaih dan chu a ṭha lo hle a ni a ti a, Republican party pawhin a chintawk hria a, an thlawpna an tihtawp a ngai a ni, a ti.

White House-a news conference a neiha he thu hi sawiin, Obama chuan Trump-a'n US-a Muslim luh khap a rawtte chu Republican member-te ngei pawhin na takin an sawisel a, heti chunga an a thlawp zel chhan a zawt bawk.

Democratic National Convention-ah khan kum 2004-a Iraq rama thihchilh bomb puaka thi, Muslim mi, US Army Captain Humayun Khan-a pa, Khizr Khan chuan thu sawiin, Donald Trump-a'n US-a Muslim mi luh khapna siam a rawt chu a sawisel a ni. Donald Trump chu ram tana engmah pawh la hlan ve lo a nih thu leh, Muslim luh khapna siam a rawt chu tumahin an thlawp loh thu a sawi. Hei hi Donald Trump chuan na taka chhang letin, Khirz Khan chuan Clinton-i campaigner-in sawi tura an hrilh angin a sawi mai niin a sawi a, a nupui Ghazala Khan chu thusawi phalsak a ni ve em tihte a zawt a ni. Khan chhungkua a beihlet dan hi veteran group bakah Republican party hruaitute pawhin an sawisel a ni.

President Obama chuan an ram tana nunna hlantu, Muslim-American sipai chhungte a beih dan aṭang chuan GOP president nominee chu America ram hruai tlak a nih lohzia a langchiang a ni, a ti.