Nigeria-a helhoin loneitu 110 that

Nigeria hmarchhak lam Borno state khawpui, Mai­dugu­ri bula thing­tlang khuaah helhoin loneitu hnathawk laite beiin, mi 110 an that. 

Pawikhawihna thlen hun hi kar liam ta Inrinni tlai lam kha niin, Koshobe leh a ṭhenawm khuaa loneitu,an thlai thar seng laite chu motor cycle-a chuang, ralthuam kengte chuan an bei a, mi 110 thatin mi dang eng emaw zatin hliam an tuar a ni.

Nigeria rama UN humani­tarian coordinator Edward Kallon chuan rawng taka pawisawilo civil mite thah an ni  chu a dem thu sawiin, hei hi kumina civil mite rawng taka beih an nih ṭum khatna a ni tih a sawi. Pawikhawihtute hian an leileta  hnathawk mek, loneitute thi manin an phuar a, chemin an hrawkah an zai nia sawi a ni. An mi that zinga ruang an hmuh tawh, mi 43-te chu Pathianni khan vui an ni a, vuina inkhawmah hian Borno governor Babaganan Umara Zulum pawh a tel.  

Inrinnia pawikhawihna thleng hi eng pawl mahin an tih niin an la chhal lo a, mahse Borno state-a pawikhawihna lo thlen fo tawh, Boko Haram helpawl leh slamic State in West Africa Province (ISWAP) te an inhnamhnawih rin a ni thung. Heng pawl pahnihte pawi­khawihna thlen ṭhin avang hian hmarchhak bialah hian kum 10 chhungin mi 30,000 chuang an thi tawh a, mi maktaduai hnih vel chu ram dangah himna zawngin an tlanchhe tawh bawk. 

President Muhammadu Buhari chuan Borno state-a helho­in loneitu thawk rim tak takte rawng taka an that chu a dem thu sawiin, ram mipuite rilru a na hle a ni, a ti. Hetih lai hian sawiseltu lam chuan pawikhawihna thlen fo tu, helho a thunun theih loh avangin President Buhari leh a kaihhruai sorkar an dem thu an sawi ve thung.