Covid-19 leng vangin Malaria vanga thi pun phah dawn
World Health Organisation (WHO) chuan Covid-19 leng vangin malaria hri leng dona atana sum pekte a tlahniam a, malaria veite enkawlna thleng a nghawng avangin a bikin sub-Saharan Africa-ah chuan malaria vei leh thihpui an pun phah thei dawn niin a sawi.
Nimina malaria chungchanga annual report a tihchhuahah, WHO chuan coronavirus leng vanga malaria veite enkawlna thlenga a nghawng chu ngaihven ngai tak a nih thu a tarlang. Sub-Saharan Africa-ah malaria veite enkawlna pek chu 10% velin a tlakhniam phah a, hei vang hian malaria vanga thi hi mi 19,000 velin an pun phah thei dawn a ni tiin report chuan a tarlang.
WHO Regional Director for Africa Dr Matshidiso Moeti chuan, Covid-19 leng vangin malaria hri dona kawnga hmalakna chu a bahhlah phah hle tih a sawi a, coronavirus leng chuan Africa ram economy leh ram dang nena an thawhpuite inkar thlengin nghawng nasa tak a nei a, hetichung hian malaria dona programme chu nasa zawka kalpui chhunzawm zel a ngai a ni, a ti.
Covid-19 hri a len hma khan Africa ram hrang hranga malaria dona programme kalpui a nih avangin he hri vei leh thihpui pawh hi an tlahniam sawt hle a ni. Hripui len hnuah pawh malaria laka invenna atana thosilen leh hmanraw dangte sem hna chu thawh chhunzawm ni tho mah se, mipuite tan heng hmanrua lak kawngah hian harsatna a awm tawh niin WHO chuan a sawi.
Kum 2019 khan khawvel pumah malaria vei hi maktaduai 229 vel an awm a, he hri thihpui hi 4,09,000 an awm bawk. Kum 2018 khan malaria thihpui hi mi 4,11,000 an awm a ni. Kum 20 kalta chhung khan ram 21-te chuan an ram aṭangin malaria hrik hi an umbo tawh a, ram 10 chu malaria laka fihlim ramah WHO chuan a lo puang tawh bawk.