Republican party-in Congress an thunun ta

US President atana Republican party candidate, Donald Trump thlan tlin a nih hnuah, Congress-a in hnih - Senate leh House of Represenative pawh Republican party-in an thunun dawn ta.

House of Representive-ah hian seat 435 awmin, majority nei turin seat 218 neih tlin a ngai a, Republican Party hian Nilaini khan seat 218 hi an nei tling ta a ni. Result hriat kim loh la awm mah se, majority nei tura seat ngai zat hian an tlin tawh a ni.

Congress upper chamber, Senate-ah Republican party hian seat 53 neiin, majority nei tura seat ngai zat 51 an lo nei tling tawh bawk. Democratic Party lamin seat 47 an nei bawk a ni. US Senate Republican leader thar atan South Dakote senator JohnThune chu thlan a ni.

Donald Trump chuan US President inthlan result puan a nih hnu leh, President atana thlan tlin a nih tih a hriat hnua thu a sawiah, an thu tiamte chu an hrereng a, an ti hlawhtling dawn tih pawh a lo sawi tawh. Republican lamin Congress in hnih an thunun dawn tak avangin President tan pawh a thutiam tihlawhtling tura hma a lakna kawngah a awlsam phah a rinawm. Trump-an a thawhpui tura administration post-a a nominee te pawh awlsam taka an pawm tlan sak theih rin a ni bawk.

White House-ah Trump leh Biden inhmu

US president Joe Biden leh president-elect Donald Trump-te chu Nilaini khan White House-a Oval Office-ah an inkawm a, January thlaa thuneihna inhlanchhawn dan chungchangte an sawi dun.

President Biden chuan Donald Trump chu a lawmpui thu sawiin, White House-ah an lo lawm tih a sawi. Trump pawhin January-a boruak ṭha tak hnuaia thuneihna inhlanchhawn tur an hman theih a beisei thu sawiin, politics chu thil harsa leh hautak tak a nih thu a sawi ve bawk.

US President election result certification hi January 6, 2025 ah tih chhuah beisei a ni a, January 20-ah Donald Trump hi US President 47-na atan Washington, DC-a US Capitol-ah lak luh a ni ang. US President hi January 20-ah lak luh a ni ṭhin a, hemi ni hi Pathianni a nih chuan January 21-ah hman a ni thung. Trump hi kum 130 chhunga a zawn loa US President term hnih chelh thei hmasa ber tur a ni a, kum 78 mi niin President atana lak luh upa ber a ni dawn bawk. President Joe Biden chuan Trump lak luhnaah hian a tel tur thu a tichiang tawh a, vice president leh inthlana Trump-a'n a hneh tak, Kamala Harris a tel dawn leh dawn loh erawh sawichian a la ni lo.