HRC-in Israel chet dan war crime tiin puh

Human Rights Watch (HRW) chuan Israel in Gaza Strip-a cheng, Palestinian mi tam tak chu an insawnchhuah luih tir a ni tiin, Israel chet dan chu war crime a ni, a ti.

Israel lam chuan HRW report hi an la chhang lo a, mahse a hma pawhin hetianga puhna hi an lo tawk fo tawh a, a dik loh thu sawiin, an sipaite international law zulzui zela an chet thu an sawi a ni.

HRW chuan Gaza Strip-a indona thleng vanga Palestinian mi, himna tura hmun dang, buffer zone leh security corridor-a sawnchhuahte chu an insawnna hmuna awm nghet tir tuma ruahmanna nia a lan thu sawiin, hei hi a hnam anga nuaibo tumna a ni thei a ni, an ti.

Mahse, Israel sipaite chuan buffer zone nghet siam tumna a awm lo tih sawiin, Israel foreign minister Gideon Saar pawhin Gaza hmarlama cheng, indona avanga hmun danga insawn chhuak lailawk, Palestinian mite chu indona a tawp veleh an awmna ngaiah an kir leh vek phalsak an ni dawn tih a lo sawi tawh bawk.

HRW report hi tun kar tira US state department report nen erawh a in ang lo hle thung. US state deparmtent report chuan Israel hian Gaza Strip-a chhawmdawlna thawn luh kawngah American law engmah palzut a nei lo tih a sawi.

Gaza-a Palestinian mite chhawmdawlna tur mamawh pung zel buaipuiin Israel chuan kawng hrang hrangin hma a la a ni, a ti. State deparment thupuangtu, Vedant Patel chuan chhawmdawlna a luhna turin khawmualah ramri pawh hawn thar a nih thu a sawi bawk a ni. US-in chhawmdawlna a lut ṭha nia a sawi laiin, UN chuan Gaza-a chhawmdawlna lut chu kumin chhunga a tlem ber lai niin a sawi ve thung.

Hezbollah ten Israel army headquarters an bei

Lebanon helpawl, Hezbollah chuan Nilaini khan Tel Aviv-a Hakirya- Israel army headquarters chu an bei tih sawiin, hei hi Tel Aviv-a sipai hmun an beih ṭum khatna a ni.

Israel sipaite chuan Hezbollah ten an headquaters an beih chungchangah hian thuchhuah engmah an la nei lo a, thi leh hliam an awm thu pawh an tarlang lo. Mahse, Lebanon aṭanga kah chhuah drone pahih leh projectile 40 an kah thlak thu erawh an sawi.

Hezbollah hian Israel sipaite hmun pawimawh beihna atan hian Qader-2 ballistic missile leh drone an hmang a ni. Hei bakah missile thar Fadi-6 an hmang nia sawi a ni bawk. Hmun pawimawh dang, Tel Nof airbase leh intelligence hmunte pawh an kap fuh tel niin an sawi.