Israel-in an embassy-te inralring turin chah

Iran nuclear scientist, Mohsen Fakhrizdeh thah a nih chungchangah Iran sorkar chuan Israel chu mawhphurtua puh a, phuba lak ngei a tum thu a sawi avangin Israel sorkar chuan ram hrang hranga an embassy-te chu fimkhur a, inralring turin a chah. 

Kar liam ta Zirtawpni khan Iran nuclear scientist, defence ministry-a  Research and Innovation Organisation  hotu Fakhrizadeh hi Tehran khawchhak lam dai, Absard hmunah a motor chhunga a awm chu tu tih hriat lohten an kap a, hliam na tak tuarin damdawi-ina kalpui a nih hnuah a thi a ni. Fakhrizadeh thah a nih hi Iran sorkar chuan a tuar na hle a, foreign ministry chuan martar-ah a puang hial a ni. Iran hotu lu ber Ayotollah Ali Khameinei chuan phuba an lak ngei tur thu a sawi. 

Fakhrizadeh thattu hriat chian ni lo  mah se Iran chuan Israel chu a inrawlh  ngeiah a puh a ni. Hemi chungchangah hian Israel bakah White House, Pentagon, US State department leh CIA pawhin  thuchhuah an nei lo a, US President-elect Joe Biden transition team pawhin engmah an sawilang lo.