Democrats-in Israel hrekna siam turin President Biden nawr

US-a Democratic lawmaker 90 dawn chuan an ram president Joe Biden hnenah, West Bank-a Palestinian mite an beih avangin Israel prime minister Benjamin Netanyahu kaihhruai sorkara cabinet member-te hrekna siam turin an ngen.

President Biden hnena lehkha an thawnah, Democrats lawmaker chuan a term a zawh hma ngeia Israel cabinet member - finance minister Bezalel Smotrich leh national security minister Itamar Ben-Gvir hrekna siam turin a ti a, anni hi Palestinian ram an luaha Israel mi awmte tharum thawh tura fuihtute niin an puh. He lehkhaah hian Democrats senator 17 leh House member 71 ten an hming an ziak.

West Bank-a khawsa, Israel mite chuan Palestinian mite ṭum 1,270 chuang an bei a ni tiin, ni khatah tharum thawhna hi chawhrualin vawi thum aia tam a thleng ṭhin niin an sawi.

He lehkha hi October 29-a an thawn tawh kha a ni a, mahse White House lam aṭangin chhanna an dawn loh avangin Ningani khan an puangzar ta a ni.

Israel laka hrekna siam tura nawrna kawnga a hma latu, Democratic senator Chris Van Hollen leh Democratic House of Representative member - Rosa DeLauro leh Sean Casten-te chuan President Biden hian executive order hnuaiah hrekna siam turin thuneihna a nei a ni, an ti.

Hetianga Israel cabinet member-te hrekna a siam chuan Israel leh Palestinian chauh ni lo, US thawhpui ram dangte tan pawh thuchah a ni nghal dawn a ni, an ti.

President Biden chuan Netanyahu kaihhruai sorkar chet dan firfiak tak chu US in a lo pawmpui zel dawn lo tih a sawichhuah a pawimawh a ni, tiin an sawi bawk.