Election law palzuta puh SKorea eptu hruaitu thiam loh chantir

South Korea court chuan nimin, November 15, 2025 khan an rama eptu pawl lian ber Democratic Party hruaitu, Lee Jae-myung chu election law palzutah puhin, thiam loh a chantir. Kum khat tang tura hrem a ni bawk a, mahse a tan hun tur hi kum hnih chhung chu tihkhawtlai theih a ni ang.

Court thutlukna chu Supreme Court-ah appeal a tum thu Lee chuan sawiin, an thutlukna siam chu pawm harsa a tih thu a sawi. Mahse a appeal-naah hian thiam loh a chang chhunzawm a nih a, a tan hun tur hi tihfel a nih chuan Parliament member a nihna hlihsak a ni ang. Kum 2027-a an ram President thlanna neih tura chuh a tumna pawh a ti thei dawn lo a ni. Lee thlawptute pawhin court thutlukna siam hi pawm loin, pawisawi lo a nih thu ziaknate kengin court bulah an pungkhawm a ni.

Lee hian kum 2022 President thlannaah khan Yoon Suk Yeol a hneh zo lo a, thubuai eng emaw zat neiin heng zingah hian eiru leh thamna laa puhna pawh a tel. Kum 2021-a Parliamentary audit-ah khan Presidential candidate a nih laia a information a thehluhah thu dik tawk lo sawiah puh niin, Public Official Election Act a kalh a ni an ti a, thiam loh chantir a ni ta a ni.

Seoul Central District Court chuan inthlan dawna thu dik tawk lo thehdarh chuan vote thlaktute rilru hruai kawiin, an ram tana mi dik leh ṭha thlanna tur kawng a dal thei a, hei hi democracy tan thil pawi tak a nih thu a sawi.

Lee hi kum 2010-2018 khan Seongnam governor niin, a hnuah Gyeonggi province governor a ni a, Parliament member-ah thlan a ni zui leh bawk. Kum 2027 President thlanna neih turah pawh chuh ngei tura beisei a ni a, kumin April thlaa Parliament inthlanah khan a party chuan hnehna a lo chang tawh a ni.