Australia-ah Kar ruk aia tam ram a kang tawh

Australia east coast lama awm UNESCO world heritage-listed Fraser Island-ah chuan kar ruk chuang ram a kang tawh a, Australian kang ṭhelhtute chuan theihtawp chhuah mah se helai hmun 40% vel zet chu nimin thleng khan a kang tawh.

Khawvela 'sand island' lian bera ramkang hian ziaawm lam a pan thei lo a, helai hmuna ramngaw dangdai tak awm chu nasa takin a kang chhe mek zel a, nimina report an tihchhuah dan chuan helai hmunah hian 'heatwave' thlen hun a nih avangin khua a lum belh nasa hle a; hei vang hian ramkang pawh hian zual lam a pan an hlau hle.

Frazer thliarkar tel hian Queensland state hmun thuma ṭhena hmun hnih vel laiah chuan khua a kheng mek a, hei vang hian kangmei pawh hi a chhuak duh zual hle a ni. Queensland Parks and Wildlife Service lam chuan hectare 74,000 vel a kang tawh tih sawiin hei hi thliarkar 42% vel a ni a, mihring bungrua erawh tihchhiat a la nei lo.

Hetiang hi ni mah se ramkang hian zual lam a pan zel chuan mihring awmna lam a hnaih zel dawn a, thuneitu lam chuan khualzin mite pawh henglai vela hmun hmingthang awmte chu tlawh an khap tawh a ni. Kangṭhelhtu lam hotute chuan water-bombing aircraft 10 laiin kang ṭhelh hna hi an bei tih an sawi a, Inrinniah ringawt pawh khan tui litre 2,50,000 lai kang ṭhelhna atan an hmang tih sawiin hetiang chung pawh hian hmasawnna vak a awm lo a ni, an ti.