Iraq-in IS bei turin volunteer a zawng
Iraq sipaite chuan Islamic State (IS) firfiakte'n Pathiannia Anbar province khawpui, Ramadi khua an lak chu laklet leh ngei an tum a, sipaite hi Shia helpawlte'n an thlawp bakah, sorkar chuan sipaite pui tura in volunteer thei a zawng mek bawk.
Cabinet chuan thuchhuah siamin, Anbar province-ah sipaite chu an indaih tawk lo a, hei vang hian sipaite pui tura inpe turin an ram ṭhalaite a sawm a ni.
IS-te'n Ramadi khua an lak hnu hian khawpui-a cheng mi sang tel chu an tlanchhe tawh a ni.
US National Security Council pawhin IS-te bei let tura tualchhung sipaite puih dan tur a ngaihtuah mek tih a sawi. Council thupuangtu, Alistair Baskey chuan khawmual sipaite puih dan turah hian local tribe-te training pek leh, Iraq kaihhruai Ramadi laklet tuma beihpui thlaknaa lo puihte a tel thu a sawi.
US President Barack Obama chuan Iraq Prime Minister Haider al-Abadi-a'n Ramadi laklet tuma hma a lakna chu a thlawp tlat tih a sawi bawk. Thawhlehni khan Obama hian security adviser-te nen meeting neiin, Iraq ram dinhmun hi an thlir a ni. Meeting-ah hian adviser 25 an tel. Obama security adviser-te hian Iraq leh Syria rama IS firfiakte beihlet an nih dan thlirin meeting hi an nei fo a ni.
Ramadi khawpui laklet tuma inbuatsaihin, khawipui aṭang a kilometre 20 vela hlaa Habbaniyah military camp-ah Shia sipai 3,000 vel an awm tawh a ni. Khawpui chhung boruak a reh hle a, mipuite'n pawn an chhuak ṭha ngam lo a, dawr inhawngte pawh IS fighter-te'n an khar tir zel a ni. Firfiakte hi in hrang hrangah kal kualin, Iraq sorkar thlawptu an awm leh awm loh an dap kual nia sawi a ni.