Thailand ram inthlan hun tur an sawn hla

Thailand-a sipai sor­kar chuan an ram inthlan­pui neih hun tur chu ram danpui siamṭhat chung­changa mipui ngaihdan lak phawt a tum avangin a sawn hla.

Nikum May thlaa Thailand Prime Minister aṭanga Yingluck Shina­watra-i paihthlak a nih hnu khan sipai rorelna hnuaiah an awm a, an ram inthlanpui hi nak­kum kum laihawl vela neih theih beisei a ni. Mah­se sipai sorkar chuan an ram danpui siamṭhatna tur duangin, hemi chungchangah hian mipui aiawhte ngaihdan lak hmasak phawt a tum a ni.

Sipai sorkar hian ram danpui siamṭhat a tumnaah hian mipui nawlpui vote la lo a, province 77-ah mipui aiawh tura thlan bikte ngaihdan chauh lak a tum a, mahse hei hi thlak lehin, mipuite vote lak a remti leh ta a ni.

Ram danpui siamṭhatna tur draft hi mipuite hmuhah phochhuah a nih hmain committee-in a pawm phawt a ngai a, August 6-ah committee hian a ngaihtuah ang. Hemi hnu hian danpui siamṭhatna tur hi mipuite hrilh hriatna turin sem chhuah phawt a ngai leh dawn a, copy maktaduai 47 vel a ngai dawn a ni. Hei hian thla thum aṭanga thla ruk vel hun a duh dawn a, hei vang hian nakkum kum laihawlah lo chuan inthlanpui hi buatsaih hman a ni dawn lo.

Sawiseltu ṭhenkhat chuan ram danpui siamṭhat an tum hi kum 2006-a Prime Minister aṭang­a paihthlak, Thaksin Shina­watra-a'n thuneihna a chan leh theih tawh lohna tura dan thar duan a ni tih an sawi. Thaksin hi paihthlak a nih hnu hian eiruk thubuai siamsak a ni a, tunah hian ram dangah himna zawngin a tlanchhe mek.