IS-te'n Syria-a Palmyra khawpui an la

Islamic State (IS) firfiakte chuan Nilaini khan Syria hmar lama khawpui hlui pawimawh tak, Palmyra khuaah lutin, security force-te nena an inbeih hnuah khawpui chhunga sorkar building pawimawhte an la.

Palmyara khawpui hi hmanlai thil hlui tam tak awmna hmun niin, Unesco chuan World Heri­tage site-ah a lo puang tawh a ni. Unesco chuan firfiakte hian khaw­pui chhunga hmanlai hmun pawi­mawhte chu an tihchhiat mai a hlauhthawng hle.

Nilaini khan IS firfiakte hi Palmyra hmarlam leh khawchhak lamah Syria security force-te nen nasa takin an inbei a, sipaite hi khawpui chhung aṭang hian an insaseng ṭan tawh a ni. Firfiakte hian khawpui hmarlam, Tadmur bial chu an thunun tawh a, inbeihna a thlen hnu hian khawpui aṭangin civil mi tam tak chu an tlanchhe tawh bawk. IS hian Syria ram zahve vel chu an thunun tawh nia sawi a ni.

Khawpui chhunga lim pawi­mawh tak takte eng emaw zat chu hmun him lamah sawn an ni tawh a, mahse a lian deuh ho erawh chu sawnchhuah theih an ni lo. Thil hlu tam zawk hi khawpui chhung chhim lam biala awm an ni a, heng hmunte hi firfiakte la lut lo mah se, lak ngei tumin an bomb mek a ni. Syria antiquities hotu, Maamoun Abdul Karim chuan Palmyra khawpuia hmanlai thil hlu tak tak awmte chu tihchhiat an nih lohna turin US kaihhruai ṭangrual pawl chu IS-te dang turin a ngen.

Palmyra khawpui hian Middle East chanchina hmun pawimawh tak a luah a, Rome awpna hnuaiah a awm ṭhin. AD 3 khan khawpui roreltute'n Rome thuneihna hi cho letin, anmahniin lalram an din ta a ni. Khawpui hi tihchhiat a nih chuan Middle Eastern history leh culture-a bung pawimawh tak a chhe tel dawn a ni.

IS firfiakte hian Iraq-a province lian ber, Anbar province khawpui Ramadi pawh an la tawh a, mahse Iraq sorkar chuan he khawpui hi lak let leh tumin a inbuatsaih mek a, US pawhin Iraq sorkar pui tur hian anti-tank missile 1,000 a thawn tawh a ni.

France chuan Iraq leh Syria ram dinhmun ngaihtuah hian thla tharah international meeting buatsaih a tum a, hetah hian firfiakte beih let dan turte an sawiho ang. France Agriculture Minister leh sorkar thupuangtu, Stephane Le Foll chuan meeting an neih turah han US Secretary of State John Kerry pawh a tel dawn tih a sawi a, midang tel tur erawh a la sawichiang lo.

Nikum September 15 khan ram 29 aiawh leh United Nations Security Council member-te chuan Paris-ah meeting neiin, firfiakte beihnaa security force-te puih dan turte an lo rel tawh bawk.