Bin Laden-a document pawimawh pholang

US official-te chuan US special force-te'n an kah­hlum tak, al-Qaida firfiak pawl hotu, Osama bin Laden-a lehkha pawimawh, Pakistan, Abbottabad-a a birukna in aṭanga an hmuhchhuahte chu sorkar website-ah an pholang.

US sorkar website-a an phochhuah zingah hian a lieutenant-te nen Arabic ṭawnga lehkha an in­thawnna te, a nupui zinga pakhat hnena a lehkha thawn leh, al-Qaida firfiak pawl zawm tumte tana ap­plication form an siamte pawh a tel. Pakistan-a a chenna inah hian Economic leh military theory, English-a ziahna bute pawh a kawl bawk.

A lehkhathawn pa­khatah, bin Laden hian a deputy-te hnenah an unau, an thawhpuite hnenah America mite beih chhunzawm zel tura hrilh turin a ti a, an hna ber chu America mi hnawksakte paihbo a ni, tihte a ziak.

Office of the Director of National Intelligence (ODNI) chuan bin Laden-a docu­ment-te hi tlangzarh a nih hmain spy agency chuan uluk takina a ennawn tih a sawi.

Pakistan, Abbot­tabad-a bin Laden-a chenna in aṭang hian paper leh video 103 hmuh­chhuah a ni a, document tam zawk chu Arabic-a inziak a ni. A lehkha pakhat chu firfiakte laka indo a puan chungchangah US President George W Bush a deusawhna a ni a, a thiltih chuan Iraq leh Afghanistan-ah boruak ralmuan a thlen phah lo a ni, a ti.

Kum 2011 May thla khan US special force chuan hun rei tak an zawn hnuin bin Laden hi Abbottabad-a a chenna inah luhkhungin an kaphlum a ni.