Israel sipaite beihpui thlaknaah Hezbollah media hotu a thi

Israel sipaiten Pathiannia Lebanon khawpui, Beirut-a Hezbollah pawl awmna building an beihnaah helpawl media hotu, Mohammad Afif a thi.

Pathianni khan Beirut khaw laili laia in chhawng sang tak pakhat chu Israel sipaiten beiin, Afif hi a thi a, mi dang pathum an hliam bawk niin Lebanon health ministry chuan a sawi. Israel sipaite pawhin Pathianni zan khan Afif an dah bo ta tih an sawi chiang ve bawk a ni. Pathianni vek khan Beirut-a Mar Elais venga in pakhat chu Israel sipaite hian bei bawkin, mi pahnih an thih bakah hliam 22 an awm niin Lebanon lam chuan an sawi.

Mohammad Afif hi Hezbollah hotu, Hassan Nasrallah media adviser ni reng ṭhin a ni a, kum rei tak chu an Hezbollah Al-Manar television station a lo enkawl tawh bawk. Afif hian Israel nena an indo hnuah, Beirut chhim lam khaw daiah press conference pawh ṭum eng emaw zat a lo buatsaih tawh. A report tih chhuah hnuhnung ber chu November 11-ah khan niin, Israel chuan Lebanon khawi lai hmun mah an la thei lo a, Hezebollah chuan indo rei tak hmachhawn turin ralthuam pawh an nei ṭha tawk tiin a sawi a ni.