Sri Lanka cabinet member-te la lut

Sri Lanka Parliament inthlan neih zawh takah, president Anura Kumara Dissanayake kaihhruai National People's Power (NPP) Party chu hneh taka thlan tlin an ni a, nimin khan cabinet member thar 22 te chu rinawmna thu tiam tira lak luh an ni.

President Dissanayake chuan finance leh defence post a chang chhunzawm leh a, an ram prime minister atan Harini Amarasuriya a ruat nawn leh bawk. Kum 54, Amarasuriya hi September thlaa President atana Dissanayake thlan tlin a nih khan Prime Minister atan a lo ruat tawh a, kum 24 chhunga Sri Lanka-a sorkar hotu atana hmeichhia ruat hmasa ber a ni.University of Edinburgh aṭangin social anthropoloy -a doctorate degree nei a ni a, sorkar tharah hian education leh higher education portfolio a chang tel bawk ang. Foreign affair leh tourism minister atan Vijitha Herath ruat nawn a ni bawk.

Kar liam taa Parliament inthlanpui an neihah, President Dissanayake kaihhruai NPP Hian seat 225 awmah seat 159 lain hnehna an chang a ni. Parliament thar inkhawm hmasa ber hi Ningani hian neih a ni dawn a, speaker tur an thlang ang. Dissanayake pawhin a policy ngaih pawimawhte chu member tharte hnenah hian a puang nghal dawn a ni.