Indonesia-ah tlang kang Mi sang chuang hmun him lamah sawn

Indonesia-a East Nusa Tenggara province-ah Pathianni khan tlangkang inphuhchhuah vangin mi 2,700 chuang chu hmun him lamah an sawn.

Pathiannia tlangkang aṭanga lei sa leh khu inphuhchhuak hi km li laia sang a ni tih an ram disaster mitigation agency chuan an tarlang a ni. Indonesia-ah hian tunah hian tlangkang 130 vel a awm mek nia tarlan niin khawvel ram hrang hrang zinga tlangkang tamna ber an ni bawk. Invawrh chhuak mai thei dinhmuna ding eng emaw zat an awm bawk niin mithiamte chuan an sawi.

Disaster mitigation agency thupuangtu Raditya Jati chuan thuchhuah a siamah hian tlangkang inphuh chhuahna hmun hi  Mt. Ile Lewotolok a nih thu leh an ram khawpui Jakarta khawchhak lam km 2,600 vela hlaa awm a nih thu a tarlang a, a chhehvela mihring chengte chu an buai phah hle niin a tarlang bawk. Thuchhuah a siamah hian thingtlang khaw 26 aṭangin mi 2,780 chu hmun him lamah sawn an ni a, thi emaw hliam emaw an awm lo tih a tarlang a ni.