Kan policy vanga thupha chawi tur kan ni lo: Israel minister

Israel deputy foreign minister thar, Tzipi Hoto­vely-i chuan ram thiang­hlim, Holy Land chu a vaiin Juda-te ta a ni tiin, West Bank-a Juda mite chenna in tur sakna policy an kalpui chungchangah Israel sorkarin thupha chawina tur chhan a nei lo, a ti.

Israel Prime Minister Benjamin Netanyahu-a kaihhruai ṭangrual sorkar tharah hian Palestinian ram an luahsak pek kir leh dodal a, Juda te chenna in sak chhunzawm zel thlawptu nghet tak tak an awm. An zingah hian Orthodox Jew member kum 36 mi, Hotovely pawh hi a tel.

Israel diplomats te hmaa thu a sawiah, Hoto­vely chuan Israel-in khaw­vel tihlawm tumin a bei a, hei hi tihtawp a, a dikna neihte pholang tura a dinchhuah a hun tawh a ni, a ti. "He ram hi kan ta a ni tih lantir tura kan dikna neihte kan neih let a ngai a ni. Hei hi kan ram a ni a, a vai hian kan ram a ni. Chumi avanga thupha chawi tur pawh kan ni lo," a ti.

Israel-in an ram khawi hmunah pawh Juda-te chenna tur in a sak chu khawvelin a pawmpui an beisei thu a sawi bawk.

Inthlanpui neih dawna an campaign-naah khan Netanyahu pawhin Palestinian state din a remtih dawn loh thu hi a lo sawi tawh a, hei hian khawthlang ramte pawh a tithinur hle. Mahse a hnuah boruak ṭha tak hnuaia Israel leh Palestinian state din tuma hmalakna chu a thlawp thu a sawi leh a ni.