Bin-Laden-a'n a aiawh turin a fapa duh

Kum 2011-a US Navy Seal-te'n Abbottabad, Pakistan-a al-Qaida firfiak pawl hotu, Osama bin-Laden an kahhlum hnua a in aṭanga document pawimawh an hmuh zinga ṭhenkhat US sorkarin a pholanah a aiawh chho zel tura a fapa kum 22 mi, Hamza a duh thu a ziahna pawh a tel.

Bin-Laden document pholan zinga ṭhenkhatte chu-

Application form

An pawl zawm tumte tana dilna, application form hmuh tel a ni. Hetah hian an experience neih tawh te, an thil tumte zawh a ni a, hemi rual hian an pawl tana thihchilh hmanga midang beih a inhuam leh huam loh te zawh a ni. An pawl tana a lo martar a nih chuan, tunge biakpawh tura a duh tih zawhna a awm bakah, natna inthlahchhawn chi an neih leh neih lohte pawh zawh tel an ni.

Bin Laden-a document zingah hian a fapa, Hamza nena lehkha an inthawnna te, Hamza-a nuin a fapa hian a pa hnung a zui zel theihna atana a ṭawngṭai ṭhin thu a hrilhna lehkha pawh a tel.

A nupui pasal dang neih a phalsak

A nupui pakhat hnena lehkha a thawnah, a thih hnuah pasal dang neih leh a phalsak thu a hrilh. "Ka awm loh hnuah pasal i nei leh duh a nih pawhin ka phalsak che a, mahse Paradise-ah ka nupui ni turin ka duh che a ni," a ti.

List tihchhuah aṭang hian Bin-Laden hian English bishop-te chanchin a chhiar ṭhin tih hriatchhuah a ni a, mahse eng ang chanchin tak nge tih erawh sawichian a ni lo.

Conspiracy theory a ngaina

Osama bin Laden hian conspiracy theory lam a ngaihven hle a, a bookshelf-ah American conspriracy theorist, Fritz Springmeier ziah, 'Bloodliness of the Illuminati' leh Eustace Mullins ziah 'The Secrets of the Federal Reserve' te a awm a, ani pawh hi conspiracy theorist a ni. New Pearl Harbor: Disturbing Questions about the Bush Administration leh 9/11, David Ray Griffin ziahte pawh hmuh tur a awm. Hei bakah hian kum 2004-a CIA officer hlui Michael Scheuer-a ziak, “Imperial Hubris: Why the West Is Losing the War on Terror,” pawh a kawl tel a ni.

Al-Qaida hruaitu document tihchhuahah hian France chungchang sawina 19 zet a awm.

A tum ber America mite tihhlum

Bin-Laden hian a tum ber erawh chu America mi a tam thei ang ber tihhlum a ni. A lehkhathawn pakhatah US President hlui, George W Bush chu tunlai huna 'Pharoah' tiin a vuah a, tualthattu tiin a puh bawk.